Maqsad — davlat xizmatlaridan tez va qulay foydalanish orqali fuqarolarning hayot sifatini yaxshilash, ortiqcha tartib-taomillarni bartaraf etish va jarayonlarning shaffofligini oshirish orqali suiiste’molchilik xavfini kamaytirish.

O‘zbekistonda “Byurokratiyani bartaraf etish — 2030” dasturi amalga oshiriladi. Bu 28-noyabr kuni prezident imzolagan “Davlat boshqaruvini raqamli transformatsiya qilish va samaradorligini oshirishga qaratilgan tashkiliy chora-tadbirlar to‘g‘risida”gi qarorda belgilangan.

Qaror “Davlat xizmatlarini ko‘rsatish bosqichlarini maqbullashtirish, jismoniy va yuridik shaxslarga ortiqcha majburiyatlar yuklatilishining oldini olish, davlat tashkilotlari, aholi va biznes o‘rtasida raqamli muloqotni to‘laqonli yo‘lga qo‘yish va bu boradagi islohotlar samaradorligini oshirish maqsadida” qabul qilingan.

Qarorga ko‘ra, 2026-yil 1-yanvardan boshlab davlat boshqaruvini raqamli transformatsiya qilish va samaradorligini oshirishga qaratilgan “Byurokratiyani bartaraf etish — 2030” dasturi ishga tushiriladi va uning asosiy vazifalari etib quyidagilar belgilanadi:

• davlat xizmatlaridan tez va qulay foydalanish orqali fuqarolarning hayot sifatini yaxshilash;
• tadbirkorlikni rag‘batlantirish, mamlakatning xorijiy investitsiyalar uchun jozibadorligini oshirish;
• raqamli boshqaruv va davlat boshqaruvi sohalarida mamlakatning ijobiy imijini shakllantirish;
• ortiqcha tartib-taomillarni bartaraf etish va jarayonlarning shaffofligini oshirish orqali suiiste’molchilik xavfini kamaytirish.

Dasturning amalga oshirilishini muvofiqlashtirish maqsadida Strategik rivojlanish va islohotlar agentligi huzurida loyiha ofisi tashkil etilsin hamda uning asosiy vazifalari etib quyidagilar belgilanadi:

• Dasturni muvaffaqiyatli amalga oshirish masalalari bo‘yicha xorijiy davlatlar va xalqaro tashkilotlar bilan hamkorlikni yo‘lga qo‘yish;
• dastur doirasida amalga oshiriladigan chora-tadbirlar bo‘yicha “yo‘l xaritasi”ni ishlab chiqish va tasdiqlash uchun O‘zbekiston Respublikasi prezidenti huzuridagi Strategik rejalashtirish va rivojlanish bo‘yicha muvofiqlashtiruvchi kengashga kiritish;
• har yil yakunida vazirlik va idoralar, Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan davlat boshqaruvida byurokratiyani bartaraf etish bo‘yicha amalga oshirilgan ishlar samaradorligini baholash, e’lon qilish hamda davlat tashkilotlari va tashabbuskorlarni rag‘batlantirish yuzasidan O‘zbekiston Respublikasi prezidentiga axborot kiritish.

Byurokratiyani bartaraf etish bo‘yicha takliflarni ishlab chiqish va ko‘rib chiqish, bu borada amalga oshirilgan ishlarning samaradorligini baholash agentlik operatori va mulkdori hisoblanadigan Zero Bureaucracy raqamli platformasi orqali amalga oshiriladi.

Dastur doirasida belgilangan chora-tadbirlarning o‘z vaqtida va samarali amalga oshirilishini ta’minlash hamda aniq natijalarga erishish uchun davlat tashkilotlarining birinchi rahbarlari shaxsan mas’ul.

Agentlik bir oy muddatda:

• Loyiha ofisi faoliyati yo‘lga qo‘yilishi uchun zarur tashkiliy chora-tadbirlarni amalga oshirishi kerak;
• “Byurokratiyani bartaraf etish” milliy mukofot tanlovini o‘tkazish reglamenti loyihasini Prezident administratsiyasiga kiritadi. Tanlov har yili o‘tkazib boriladi.
• Raqamli texnologiyalar vazirligi bilan birgalikda Zero Bureaucracy raqamli platformasi ishga tushirilishini va muntazam yangilab borilishini ta’minladi.