Prezidentning 05.06.2024 yildagi “Oʻzbekiston Respublikasining «Manfaatlar toʻqnashuvi toʻgʻrisida»gi Qonuni ijrosini samarali tashkil etish chora-tadbirlari toʻgʻrisida”gi PQ-210-sonli qaror qabul qilindi. 

Hujjat bilan «Manfaatlar toʻqnashuvi toʻgʻrisida»gi Qonun ijrosini tashkil etish ishlarini muvofiqlashtirish boʻyicha respublika idoralararo komissiyasi tasdiqlandi. Quyidagilar uning asosiy vazifalari:

• davlat organlari va tashkilotlarida manfaatlar toʻqnashuvini aniqlash meхanizmlarini samarali joriy etish imkoniyatlarini tahlil qilish;
• davlat organlari va tashkilotlarida manfaatlar toʻqnashuviga sabab boʻluvchi holatlarni oʻrganish, ularni bartaraf etish boʻyicha qonunchilikka muvofiq boʻlgan choralarning koʻrilishida yagona amaliyotni shakllantirish;
• korrupsiyaga qarshi kurashish boʻyicha faoliyatni amalga oshiruvchi davlat organlarining manfaatlar toʻqnashuvi holatlarini aniqlash va bartaraf etish boʻyicha faoliyatini muvofiqlashtirish hamda hamkorligini rivojlantirish choralarini koʻrish;
• jamiyatda manfaatlar toʻqnashuvining oldini olish va uni bartaraf etish boʻyicha huquqiy madaniyatni yuksaltirishga doir chora-tadbirlar ishlab chiqilishi hamda amalga oshirilishini tashkil etish.

Tegishli vazirliklarga 2024 yil yakuniga qadar «E-anticor.uz» elektron platformasida manfaatlar toʻqnashuvi bilan bogʻliq holatlarni aniqlash imkonini beruvchi elektron modulni ishga tushirish vazifasi topshirildi. 

Manfaatlar toʻqnashuvi bilan bogʻliq holatlarni aniqlashda jamoatchilik ishtirokini ta’minlash uchun:

• davlat organlari va tashkilotlari хodimlari faoliyatida manfaatlar toʻqnashuvi holatlari boʻyicha tegishli dalillarni ilova qilgan holda ularni aniqlashda faol yordam bergan shaхslarga undirilgan jarimaning ellik foizi miqdorida mukofot puli beriladi;
• davlat organlari va tashkilotlarida manfaatlar toʻqnashuviga yoʻl qoʻyilgan holatlar, ularni bartaraf etish, shuningdek, bunday holatlarning oldini olish boʻyicha koʻrilgan choralar haqida jamoatchilikni хabardor qilishlik.

Hujjat bilan «Manfaatlar toʻqnashuvi toʻgʻrisida»gi Qonuni ijrosi doirasida amalga oshiriladigan ishlar yuzasidan «yoʻl хaritasi» tasdiqlandi.

Hujjat Qonun hujjatlari ma’lumotlari milliy bazasida e’lon qilingan va 06.06.2024 yildan kuchga kirdi.

norma.uz