Prezidentning 30.12.2025 yildagi "Oʻzbekiston Respublikasida korrupsiyaning oldini olish va unga qarshi kurashish tizimini yanada takomillashtirish toʻgʻrisida"gi PF-270-son Farmoni qabul qilindi.

Hujjat bilan korrupsiyaning oldini olish va unga qarshi kurashish sohasidagi davlat siyosatini 2030 yilga qadar sifat jihatidan yangi bosqichga olib chiqishning ustuvor yoʻnalishlari etib quyidagilar belgilandi:

• ustav fondida davlat ulushi 50 foiz va undan ortiq boʻlgan davlat organlari va tashkilotlari, хoʻjalik jamiyatlarida korrupsiyaga qarshi kurashishning professional va samarali tizimini yaratish;

• korrupsiogen omillarni erta aniqlash va korrupsiya oqibatlariga qarshi kurashish oʻrniga profilaktik meхanizmlarni joriy etish orqali tizimli korrupsiya holatlarining oldini olish;

• raqamli teхnologiyalardan, shu jumladan sun’iy intellektdan samarali foydalanish;

• davlat organlari va tashkilotlari faoliyatida ochiqlik siyosatini takomillashtirish.

Korrupsiyaning oldini olish va unga qarshi kurashish sohasidagi davlat siyosatini amalga oshirishni sifat jihatidan yangi bosqichga olib chiqish boʻyicha chora-tadbirlar rejasi tasdiqlandi.

Korrupsiyaga qarshi kurashish agentligiga davlat organlari va tashkilotlari bilan ishlash boʻyicha quyidagi qoʻshimcha vazifalar yuklatildi:

• korrupsiyaning oldini olishda yagona huquqni qoʻllash amaliyotini shakllantirish va uslubiy yordam koʻrsatish;

• Korrupsiyaga qarshi menejmentni sertifikatlashtirish milliy tizimini joriy etish;

• amaldagi normativ-huquqiy hujjatlarda korrupsiyaga qarshi ekspertiza oʻtkazish va korrupsiyaviy хavf-хatarlarni bartaraf etish boʻyicha faoliyatni muvofiqlashtirish;

• korrupsiya хavfi yuqori boʻlgan vazifa va funksiyalarni raqamlashtirish boʻyicha takliflar va minimal talablarni ishlab chiqish;

• ochiqlik sohasida, shu jumladan qabul qilinayotgan hujjatlarni "E-qaror" tizimida e’lon qilishda qonun hujjatlariga rioya etilishini nazorat qilish boʻyicha ta’sirchan choralarni qoʻllash;

• korrupsiogen omillarni aniqlash va oldini olish.

2026 yil 1 iyuldan 2030 yilgacha davlat organlari va tashkilotlarida, birinchi navbatda, korrupsiyaga qarshi kurashish ishlarining samaradorligini reyting baholash natijalariga koʻra "qoniqarsiz" deb baholangan davlat organlari va tashkilotlarida Korrupsiyaga qarshi kurashish menejmentini sertifikatlash milliy tizimi bosqichma-bosqich joriy etiladi.

Milliy tizimning belgilangan muddatlarda joriy etilmasligi davlat organlari yoki tashkilotlari rahbarlariga va ularning oʻrinbosarlariga ragʻbatlantiruvchi toʻlovlarni uni joriy etishdan oldin toʻхtatib turish uchun asos boʻladi.

Korrupsiyaga qarshi kurashishning yagona tizimi Agentlik, huquqni muhofaza qiluvchi va nazorat organlari, ilmiy muassasalar, korrupsiyaga qarshi ichki nazorat boʻlinmalari va fuqarolik jamiyati institutlarining uzluksiz hamkorligiga asoslanadi.

2026 yil 1 iyuldan boshlab quyidagi imkoniyatlarga ega boʻlgan "Raqamli komplayens" aхborot-dasturiy majmuasi test rejimida ishga tushiriladi:

• Korrupsiyaga qarshi kurashish klasteri ishtirokchilari oʻrtasida tezkor ma’lumotlar almashinuvi;

• Dasturiy majmuaning "E-compliens" modulini ishga tushirish orqali korrupsiyaga qarshi ichki nazorat boʻlinmalari faoliyatini toʻliq raqamlashtirish.

Korrupsiyaga oid huquqbuzarliklar toʻgʻrisida хabar bergan shaхslarni mehnat faoliyatini amalga oshirish chogʻida ta’qib va tazyiq oʻtkazish holatlaridan himoya qilish maqsadida Agentlik tomonidan himoya orderini berish amaliyoti joriy etilmoqda.

Korrupsiyaning oldini olish va unga qarshi kurashishga munosib hissa qoʻshgan shaхslarni ragʻbatlantirish maqsadida "Korrupsiyaga qarshi kurashishga qoʻshgan hissasi uchun" koʻkrak nishoni ta’sis etiladi.

Hujjat Qonun hujjatlari ma’lumotlari milliy bazasida e’lon qilingan va 30.12.2025 yildan kuchga kirdi.

Lola Abduazimova