Joriy yilning 25- va 29-mart kunlari Olmaliq kon-metallurgiya kombinatida tarixiy voqea ro‘y berdi. “Yoshlik I” koni ma'danlarini qayta ishlashga mo‘ljallangan 3-Mis boyitish fabrikasining yirik maydalash sexida yuklama bilan sinov jarayonlari o‘tkazildi.

Jarayon yirik maydalash sexi boshlig‘i Baxtiyor Eshboyevning OKMK bosh muhandisi Sergey Larionovga sex ma'danini qabul qilishga tayyor ekanligi borasidagi hisobotidan boshlandi.

Shundan so‘ng, ma'lumot ma'dan qabul qilish sexi boshqaruv pulti operatoriga yetkazildi va sexga kon transportlari tomonidan keltirilgan ma'dan tushirila boshlandi. Bunda “Yoshlik I” konidan keltirilgan ma'dan shu konning o‘zida joylashgan yirik maydalash sexining 1-bosqich maydalash uzelining qabul qiluvchi bunkerlariga yuklandi. Har bir bunker bir vaqtning o‘zida 2 tadan kon transportini qabul qilish imkoniyatiga ega. Shundan so‘ng ma'dan KKD-1500/200 (180)M-2P rusumli konusli yirik maydalagichlarda ma'dan 300-350 mm gacha kattalikda maydalandi.

Keyingi bosqichda yirik maydalangan xomashyo 6 ta plastinkali ta'minlagichlar yordamida tasmali konveyerlar orqali uzunligi 4200 metrni tashkil etuvchi 2 ta magistral konveyerlarga kelib tushdi. O‘z navbatida, har biri 1500 kilovatt quvvatiga ega bo‘lgan 4 ta elektr dvigatellari bilan jihozlangan ushbu konveyerlarining har ikkalasi soatiga 6500 tonnadan ma'danni, sekundiga 4 m tezlikda “Yoshlik I” konidan 3-Mis boyitish fabrikasida joylashgan umumiy sig‘imi 320 ming tonna bo‘lgan yirik maydalangan ma'dan omboriga yetkazib beradi.

Ushbu ombordan ma'dan quruq g‘alvirlash bo‘limiga yuboriladi va reglamentga muvofiq texnologik jarayonning keyingi bosqichlariga uzatiladi.

Joriy yilning 29-mart kuni tarixiy voqea ro‘y berdi. 3-Mis boyitish fabrikasining ilk konsentrati olindi. Mazkur tarixiy jarayonda OKMK boshqaruv raisi Abdulla Xursanov, kombinat mas'ullari ishtirok etishdi.

Ta'kidlash joizki, konda huddi shunday yana 2 ta inshoot, birinchi va ikkinchi maydalab-yuklash majmualari qurilishi yakunlanib, foydalanishga topshirilish arafasida. Ahamiyatlisi, 3-MBFning texnologik jarayonlari aynan kondan boshlanadi. Ya'ni, 1500 mm kattalikgacha bo‘lgan ma'danlar ushbu qurilmalarda birlamchi maydalashdan o‘tadi.

Majmuada kon transportlaridan ma'danni to‘kish jarayonida atrof-muhitga chang ko‘tarilib ekologiyaga zarar yetkazilishining oldini olish maqsadida to‘liq avtomatlashtirilgan yuqori bosim ostida suv purkash tizimi joriy etilgan. Bu kelgusida “Yoshlik I” konini “yashil” kon deb e'tirof etilishi uchun xizmat qiladi.

Shu kunlarda 3-Mis boyitish fabrikasida ishlab chiqarish bo‘linmalarini, texnologik liniyalarini va avtomatlashtirilgan boshqaruv tizimini bosqichma-bosqich ishga tushirish ishlari jadal amalga oshirilmoqda.

OKMK Axborot xizmati