Mamlakatimiz mustaqilligining 33 yilligi hamda OKMK tashkil topganligining 75 yilligi munosabati bilan Angren kon boshqarmasi shaxtalarida mehnat qiluvchi chiroqchilar o‘rtasida “Eng yaxshi chiroqchi” kasb mahorati tanlovi o‘tkazildi.

Tanlovda “Qizil olma”, “Samarchuq”, “Ko‘chbuloq”, “Razvedochnaya”, “Qayrag‘och” konlaridan 10 nafar chiroqchilar bahs olib borishdi.

Ishtirokchilar o‘z kasblariga hamda mehnat muhofazasi va xavfsizlik texnikasiga oid savollarga yozma javob berishdi.

Tanlov natijalariga ko‘ra, faxrli 3-o‘rinni “Qizil olma” shaxtasi vakilasi Nargiza Haydarova egalladi.

“Ko‘chbuloq” shaxtasi sharafini himoya qilgan Zulfiya Zokirova 2-o‘rinni egalladi.

“Qayrag‘och” shaxtasida chiroqchi vazifasida ishlovchi Fatime Xoshimova g‘oliblikni qo‘lga kiritib, “Eng yaxshi chiroqchi” deya e'tirof etildi.

Tanlov g‘oliblari esdalik sovg‘lari bilan rag‘batlantirildi.

Ma'lumot uchun: chiroqchi kasbi asosan yer osti konlarida mavjud bo‘lib, ushbu kasb egalari konchilarga akkumulyatorli yoritqichlarni tarqatishadi va yoritqichlarni quvvatlantirishadi. Ishchi-xodimlarga beriladigan akkumulyatorli yoritqichlar, chiroq xonadan berilganidan so‘ng kamida 10 soat mobaynida to‘xtovsiz me'yoriy yonish davomiyligini ta'minlab berishi kerak.

Sherzod G‘aniyev,

Angren KB kasaba uyushmasi qo‘mitasi raisi