Mamlakatimizda olib borilayotgan islohotlarning bosh mezoni “Inson qadri uchun” degan ustuvor tamoyilning amaldagi ifodasini har bir bayram arafasida Olmaliq kon-metallurgiya kombinati tomonidan bajarilayotgan xayrli ishlar misolida ko‘rishimiz mumkin.

An'anaga sodiq qolgan holda O‘zbekiston  Respublikasi Mustaqilligining 31 yillik shodiyonasi arafasida OKMK rahbariyatining tashabbusi bilan 55 nafar  kombinatda  ishlab, nafaqaga  chiqqan  baynalminal jangchilarga, 4 nafar kombinatda ishlab, nafaqaga chiqqan Chernobil AES halokatini bartaraf etishda ishtirok etganlarga, 3 nafar Ikkinchi jahon urushi va 28 nafar mehnat fronti  faxriylariga o‘zida 9 xil oziq-ovqat mahsulotlaridan tashkil topgan jamlanmalar tuhfa etildi.

Shuningdek, OKMK xodimlari kasaba uyushmasi Kengashi tomonidan ham 97 nafar kombinatda ishlab, hozirda  nafaqada bo‘lgan ijtimoiy  himoyaga  muhtoj  pensionerlarga, 36 nafar boquvchisini yo‘qotgan  oilalarga ham oziq-ovqat jamlanmalari tarqatildi.

Bu kabi e'tibor va g‘amxo‘rlikdan xursand bo‘lgan nuroniylar o‘z minnatdorchiliklarini bildirishdi va Yaratgandan yurt tinchiligini so‘rab duoga qo‘l ochishdi.

Feruza Bazarova,

OKMK xodimlari kasaba uyushmasi Kengashi

ijtimoiy himoya bo‘yicha mutaxassis