Joriy yilning 30-iyul kuni OKMK boshqaruv raisi Abdulla Xursanov “Bir bo‘lsak - yagona xalqmiz, birlashsak - Vatanmiz!” shiori ostida O‘zbekiston Respublikasi Davlat mustaqilligining o‘ttiz uch yilligiga munosib tayyorgarlik ko‘rish va nishonlash to‘g‘risida”gi buyruqqa imzo chekdi.

Buyruqqa ko‘ra, O‘zbekiston Respublikasi davlat mustaqilligining o‘ttiz uch yilligiga munosib tayyorgarlik ko‘rish va bayram tadbirlarini o‘tkazish bo‘yicha ishchi guruh tarkibi va chora-tadbirlar rejasi tasdiqlandi.

Shuningdek, kombinat tarkibiy bo‘linmalari rahbarlari korxonalarni davlat mustaqilligining o‘ttiz uch yilligini nishonlashga bag‘ishlangan shiorlar va bannerlar bilan bezatishi hamda tarkibiy bo‘linmalarda bayram tadbirlariny yuqori saviyada tashkillashtirishi belgilandi.

Bundan tashqari, O‘zbekiston Respublikasi davlat mustaqilligining o‘ttiz uch yilligiga munosib tayyorgarlik ko‘rish va bayram tadbirlarini o‘tkazish bo‘yicha chora-tadbirlar rejasiga ko‘ra, tarkibiy bo‘linmalar hududlari va biriktirilgan ko‘chalar obodonlashtiriladi.

Olmaliq shahrining ijtimoiy soha obyektlari, ko‘chalari, xiyobonlari hamda tarkibiy bo‘linmalar hududlari bayramona bezatiladi. OKMK faol yoshlari, kasaba uyushmalar mas'ullari ijtimoiy himoyaga muhtoj keksalar, pensionerlar va nogironligi bo‘lgan shaxslar, yolg‘iz qariyalar, kam ta'minlangan, boquvchisini yo‘qotgan oilalarning uy-joylarida hasharlar uyushtirishadi.

Kombinat tarkibiy bo‘linmalarida ishchi-xodimlar o‘rtasida O‘zbekiston Respublikasi davlat mustaqilligining o‘ttiz uch yilligiga bag‘ishlanib "Bir bo‘lsak yagona xalqmiz, birlashsak Vatanmiz!" shiori ostida she'rlar, rasmlar chizish, jamoaviy bayram tabrigi (fleshmob usulida) tanlovlari, sport musobaqalari tashkil etiladi.

Har yilgi an'anaga binoan, tarkibiy bo‘linmalarga biriktirilgan maxsus ixtisoslashtirilgan muassasalarda bayram dasturxonlari ham yoziladi va ikkinchi jahon urushi va mehnat fronti qatnashchilariga, mehnat faxriylariga oziq-ovqat to‘plamlari tarqatiladi.

Shuningdek, bayram arafasida Olmaliq shahrining markaziy ko‘chalarida kombinat yoshlari ishtirokida yurish marafoni o‘tkaziladi.

OKMK Axborot xizmati