Joriy yilning 13-dekabr kuni “Metallurg” madaniyat saroyining 60 yilligi keng nishonlandi.

Tadbirda so‘z olgan “Olmaliq kon-metallurgiya kombinati” AJ boshqaruv raisi Abdulla Xursanov ushbu madaniy dargohning xodimlari bugungi kunda ko‘pmillatli kombinat ishchi-xodimlarining ma'naviy dunyoqarashini oshirish yo‘lida sidqidildan xizmat qilib kelishayotganini, ayniqsa madaniyat saroyi bolajonlarning sevimli maskaniga aylanganini ta'kidlab, mehnat jamoasiga o‘zining samimiy tilaklarini bildirib o‘tdi.

Tadbirda madaniyat saroyi ijodiy guruhlarining faoliyati va yutuqlarini aks ettiruvchi ko‘rgazma ham tashkil etildi.

Darhaqiqat, muhtasham “Metallurg” madaniyat saroyi nafaqat Olmaliq shahri balki Toshkent viloyati va Respublikamizdagi eng ko‘zga ko‘ringan saroylaridan biri hisoblanadi. Saroyda Olmaliq shahri, viloyat va Respublika miqyosidagi tadbirlar, tanlovlar, kinopremyeralar, ijodiy uchrashuvlar muntazam o‘tkazib kelinadi.

Ushbu maskanda faoliyat olib borayotgan badiiy havaskorlik jamoalari Olmaliq shahri va respublika miqyosida o‘tkazilayotgan ommaviy va madaniy tadbirlarda faol ishtirok etib kelishadi. Hozirda “Metallurg” madaniyat saroyida 25 ta badiiy havaskorlik jamoalari bo‘lib, ularda qatnashuvchi bolalar soni 550 nafardan ziyodni tashkil etmoqda. Jamoalar shu kunga qadar juda ko‘p yutuqlarni qo‘lga kiritishgan. Masalan, bu yilning o‘zida “Edelveys” xalq raqs ansambli turli tanlovlarda 5 marotaba 1 o‘rin va 2 marta gran-prini qo‘lga kiritdi. "Kaleydoskop" raqs ansambli 2 marta 1-o‘ringa va 3 marta gran-priga sazovor bo‘ldi. “Raduga" xalq sirk jamoasi esa 2 marta gran-pri sovrindorlari bo‘lishdi. 

“Metallurg” MS 1952-yilda qurilib, 1964-yilning noyabr oyida foydalanishga topshirilgan.

2018-yilda to'liq ta'mirdan chiqarilib, zamonaviy qiyofaga keltirilgan. Bolajonlarning shug‘ullanishi va ishchi-xodimlar uchun barcha  qulay shart-sharoitlar yaratilgan.

Tadbirda sana munosabati bilan bir guruh madaniyat saroyi ishchi-xodimlari Faxriy Yorliqlar va qimmatbaho sovg‘alar bilan taqdirlanishdi.

Madaniyat saroyi ijodiy guruhlari tomonidan tayyorlangan konsert dasturi barchaga manzur bo‘ldi.

Axborot xizmati