Ma'lumki, Olmaliq kon-metallurgiya kombinati Xitoyning ko‘plab yetakchi kompaniyalari bilan o‘zaro manfaatli hamkorlik aloqalarini yo‘lga qo‘yib kelmoqda.

Ayniqsa, joriy yilning 14-15 avgust kunlari Pekin shahrida o‘tkazilgan “OKMK biznes forumi”da bir qator Xitoy kompaniyalari bilan hamkorlik aloqalari o‘rnatildi. Jumladan, forumda “Huawei Technologies Co. Ltd.” kompaniyasi bilan muzokaralar o‘tkazilib, strategik hamkorlik bo‘yicha dastlabki kelishuvga erishilgan edi.

Mazkur hamkorlik aloqalari doirasida joriy yilning 13-sentyabr kuni “Huawei Technologies Co. Ltd” kompaniyasi vakillari OKMKga tashrif buyurishdi.

Dastlab, mehmonlar uchun kombinat muzeyi tanishtirilib, texnologik ishlab chiqarish zanjiri bo‘yicha to‘liq ma'lumot berildi.

Shundan so‘ng, OKMK mas'ullari va mutaxassislari hamda Huawei kompaniyasi vakillari o‘rtasida uchrashuv tashkil etildi.

Uchrashuvda Huawei kompaniyasining faoliyati bo‘yicha taqdimot qilindi.

O‘zaro muzokaralar chog‘ida tomonlar bir qator yo‘nalishlar bo‘yicha kelishuvga erishishdi. Jumladan, Huawei kompaniyasi kelgusida komibinat mutaxassislarining o‘rganishlari uchun kompaniyaning ilg‘or texnologiyalari bo‘yicha batafsil ma'lumot va taqdimot tayyorlab berishadi.

O‘zbekistonda quvvati bir GVt bo‘lgan akkumulyator batareyalarini ishlab chiqaradigan zavod qurilishi bo‘yicha yo‘l xaritasi ishlab chiqiladi.

Shuningdek, “Huawei” kompaniyasi mutaxassislari tomonidan ishchi guruh tuzilib, ular kombinat texnologik jarayoniga sun'iy intellektni joriy qilish imkoniyatlarini o‘rganib chiqishadi.

Ma'lumot uchun: Huawei kompaniyasi 1987-yilda Shenchjenda tashkil etilgan. Kompaniya axborot texnologiyalari sohasida dunyodi yetakchi sanaladi. Shuningdek, kompaniya aloqa tizimi uchun uskunalar, dunyoning 170 ta davlatiga turli sohalar uchun IT mahsulotlar taklif etadi Bundan tashqari, kompaniya smartfonlari, noutbuklar va aqlli uylar uchun gadjetlar ishlab chiqaradi.

Axborot xizmati