OKMKning 75 yilligi munosabati bilan o‘tkazilayotgan shaxmat haftaligi doirasida tarkibiy bo‘linmalarda aql gimnastikasi bo‘yicha musobaqalar tashkil etilmoqda.

Mis boyitish fabrikasi

MBF Kasaba uyushmasi qo‘mitasi sport va sog‘lomlashtirish masalalari bo‘yicha komissiyasi raisi Akrom Mamayusupovning ma'lum qilishicha, fabrika ishchi-xodimlari o‘rtasidagi birinchilikda barchadan kuchli dona surgan 2-Maydalash va boyitish majmuasi sexi tegirmon mashinisti Muhammad Boynazarov g‘oliblikni qo‘lga kiritdi.

Muhammad endilikda kombinat miqyosida o‘tkaziladigan shaxmat musobaqasida fabrika sharafini himoya qiladi.

E'tiborli jihati musobaqaga hakam sifatida fabrikada ishlab nafaqaga chiqqan pensioner, shahrimizning taniqli professional shaxmat ustasi Vyacheslav Agzamov ham taklif etilib, musobaqa so‘ngida u va ishtirokchilar o‘rtasida seans o‘yini ham tashkillashtirildi.

3-Mis boyitish fabrikasi

Yangi barpo etilayotgan 3-Mis boyitish fabrikasi ishchi-xodimlari o‘rtasida o‘tkazilgan shaxmat musobaqasi ham qiziqarli bahslarga boy bo‘ldi.

Fabrika sport yo‘riqchisi A.Ashirovning ma'lumotiga ko‘ra, erkaklar o‘rtasidagi bahslarda A.Abdunazarov, S.Qurbonov va S.Toshpo‘latovlar sovrindor bo‘lishgan.

Ayollar o‘rtasidagi bahslarda esa Sh.Solijonova, X.Odilova, Q.Samatovalar kuchli dona surishgan holda sovrinli o‘rinlarni egallashgan.

Ijtimoiy obyektlar boshqarmasi

Boshqarma sport yo‘riqchisi Farhod Usvaliyevning ma'lum qilishicha, boshqarma tasarrufidagi “Nuroniy” faxriylar uyida uch avlod vakillari o‘rtasida shaxmat bo‘yicha turnir o‘tkazilgan.

Do‘stona ruhda o‘tgan o‘rtoqlik turnir mehnat faxriylari va yoshlar o‘rtasidagi hamjihatlikni targ‘ib qilish maqsad qilingan.

Turnirda faol ishtirok etgan faxriylar va yoshlar kasaba uyushmasi qo‘mitasi tomonidan esdalik sovg‘alari bilan rag‘batlantirildi.

Avtomobil transport boshqarmasi

Kombinat avtomobilchilari o‘rtasidagi shaxmat musobaqasi ham qizg‘in bahslarga boy bo‘ldi.

Korxona yoshlar ittifoqi raisi Azamat Abdujabbarovning ma'lum qilishicha, musobaqada g‘oliblikni ATB energetigi O.Sapparov qo‘lga kiritdi.

Xo‘jalik ta'mir uchastkasi boshlig‘i R.Abdug‘aniyev 2-o‘rinni egalladi.

1-avtokorxona haydovchisi R.Berdiyorovga faxrli uchinchi o‘rin nasib etdi.

Mirzo Ulug‘bek MFY

Shahmat haftaligi doirasidagi musobaqalar nafaqat kombinat tarkibiy bo‘linmalarida balki shahrimizdagi mahallalarda ham o‘tkazilmoqda.

Jumladan, shahrimizdagi Mirzo Ulug‘bek nomidagi mahallada tashkil etilgan musobaqada nuroniy otaxonlar, huquq-tartibot idoralari xodimlari va mahalla yoshlari g‘oliblik uchun dons surishdi.

Musobaqa yakuniga ko‘ra, Sh.Nishonov, U.To‘ychiyev va P.Abdug‘apparov sovrinli o‘rinlarni qo‘lga kiritishdi.

Shuningdek, Shaxtaqurilish boshqarmasi, Innovatsion texnologiyalarni ishlab chiqish va joriy etish markazi, Idoraviy harbiylashtirilgan qo‘riqlash xizmati kabi tarkibiy bo‘linmalarda ham shaxmat musobaqalari yuqori saviyada tashkil etildi.

Hokim Boxirov,

OKMK xodimlari kasaba uyushmasi Kengashi

jismoniy tarbiya va sport bo‘limi mudiri