Olmaliq kon-metallurgiya kombinatida yoshi ulug‘ mehnat faxriylari va ustozlar doimo e'zozlanib kelingan. Ushbu an'ana OKMKning 75 yilligi munosabati bilan ham davom ettirilmoqda. Kombinat tarkibiy bo‘linmalarida ko‘p yillar davomida mehnat qilgan, hozirda keksalik gashtini surayotgan mehnat faxriylari va ishchi-xodimlar o‘rtasida “Uch avlod uchrashuvlari” tashkil etilmoqda.

Jumladan, mana shunday tadbirlar biri bugun Markaziy ta'mirlash mexanika zavodida o‘tkazildi.

Uzoq yillar zavodda ishlagan, hozirgi kunda nafaqada bo‘lgan ustozlarga ehtirom ko‘rsatilib, ular uchun bayram dasturxoni yozildi. Taklif qilingan mehnat faxriylari MTMZ rahbariyati va Kasaba uyushmasi tomonidan esdalik sovg‘alar bilan taqdirlanishdi.

Uchrashuvda mehnat faxriylari xotiralari bilan o‘rtoqlashdilar.

Shuningdek, “Uch avlod” uchrashuvi Shaxtaqurilish boshqarmasida ham tashkil etildi. Korxona faxriylari I.Mavlonov, Sh.Teshayev va D.Saidyakubovalar yoshlar bilan o‘z tajribalarini o‘rtoqlashdilar. Mehnat faxriylari va yoshlar o‘rtasida korxona tarixi, bugungi kuni va istiqboli to‘g‘risida samimiy muloqot o‘tkazildi.

Keksa avlod vakillari va yoshlar o‘rtasidagi uchrashuv bugun Texnologik transport boshqarmasida ham o‘tkazildi. Samimiy ruhda o‘tkazilgan uchrashuvda nuroniylar o‘z malakalari va orttirgan hayotiy tajribalari bilan o‘rtoqlashdilar.

Bu kabi uchrashuv Sanoat temiryo‘l transport boshqarmasida ham o‘tkazilib, unda temir yo‘l sohasining mehnat faxriylari o‘zlarining hayotiy tajribalarini so‘zlab berishdi.

Axborot xizmati