2024-yil 16-noyabr kuni "Metallurg" madaniyat saroyida yoshlar o‘rtasida IT rolini oshirish va ommalashtirish bo‘yicha tadbirlarni amalga oshirish doirasida Olmaliq IT Community Roadshow bo‘lib o‘tdi.

OKMK Raqamlashtirish departamenti va O‘zbekiston IT hamjamiyati hamkorligida tashkil etilgan tadbirda Axborot texnologiyalari bo‘yicha mutaxassislar, ekspertlar ishtirok etishdi.

Tadbir davomida sohaning jahon miqyosidagi mutaxassislari IT sohasidagi karyera va professional brend, ish topish va frilanserlik, shuningdek, shaxsiy samaradorlik haqida  yoshlarga qiziqarli va qimmatli ma'lumotlar berishdi.

Shuningdek, Roadshow dasturida soha mutaxassislari tomonidan mahorat darslari va ma'ruzalar, netvorking sessiyasi hamda faol ishtirokchilar o‘rtasida sovrinli viktorinalar o‘tkazildi.

Tadbirda so‘z olgan O‘zbekiston IT hamjamiyati rahbari Shavkat Karimov bugungi kunda axborot texnologiyalarining jamiyatdagi o‘rni, sohani yoshlar va xotin-qizlarga o‘rgatish muhim ahamiyat kasb etishini ta'kidladi. Bu kabi tadbirlar ham aynan shu maqsadda tashkil etilganini bildirdi.

Bugungi kunda OKMKda ham axborot texnologiyalarini ishlab chiqarish jarayoniga tatbiq etish borasida samarali ishlar amalga oshirib kelinmoqda.

Axborot xizmati