Har qanday ishlab chiqarish korxonalari va ijtimoiy soha obyektlarida sodir bo‘lishi mumkin bo‘lgan favqulodda vaziyatlarni tezkorlik bilan bartaraf etish, moddiy boyliklarni asrash hamda ishchi-xizmatchilar xavfsizligini ta'minlashda soha xodimlari tomonidan o‘tkazib kelinayotgan o‘quv-taktik mashg‘ulotlarning ahamiyati beqiyos. Shu sababli OKMKning barcha tarkibiy bo‘linmalarida bu kabi amaliy mashg‘ulotlar muntazam ravishda o‘tkazib kelinadi. Navbatdagi o‘quv mashg‘uloti joriy yilning 19-noyabr kuni Qalmoqqir kon boshqarmasining Markaziy karyerida «Favqulodda vaziyatlar sodir bo‘lganda Fuqaro moxofazasi tuzilmalari va Favqulodda vaziyatlar davlat tizimi quyi tizimining harakati» mavzusida o‘quv-mashg‘uloti o‘tkazildi.

O‘quv mashg‘ulot ssenariysiga ko‘ra, 2024-yilning 19-noyabr kuni soat 13:30 da «Qalmoqir» kon boshqarmasiga qarashli markaziy karyerida BelAZ-75131 rusumli avtosomasvali qayta yuklash joyiga tog‘ jinslarini to‘kish vaqtida pastki pog‘onada turgan 54-ekskavator ustiga ag‘darilib tushib ketadi va yoqilg‘i baki yorilib, chaqnash natijasida  yongin yuzaga keladi. Oqibatda ekskavator mashinisti va BelAZ  avtosamosvali haydovchisi boshqaruv kabinasida jarohatlanib qisilib qoladi. Bu vaqtda harakatlanuvchi qismlarini ko‘zdan kechirayotgan va ularga texnik xizmat ko‘rsatayotgan ekskavator mashinisti yordamchisini ustiga tog‘ jinslari sirpanib tusha boshlaydi va u tan jarohati oladi. 

Ushbu holatni ko‘rgan buldozer haydovchisi zudlik bilan Qalmoqqir kon boshqarmasi tog‘-kon dispetcherlik xizmatiga belgilangan tartibda xabar beradi. 

Shundan so‘ng, dispetcherlik xizmati tomonidan soat 13:35 ga qadar kon boshqarmasi rahbariyati, Fuqaro muhofazasi otryadi va kombinat obyektlarida yong‘in xavfsizligini ta'minlashni tashkil etish bo‘limi(OYXTTEB) xabardor qilinadi.

10 daqiqa ichida kon boshqarmasi Ichki qo‘riqlash xizmati tarkibidan tashkil topgan ko‘ngilli yong‘in o‘chirish guruhi favqulodda holat sodir bo‘lgan joyga yetib kelib, yuzaga kelgan yong‘inni o‘chirish va jabrlanganlarga birinchi yordam ko‘rsatishni boshlaydi. 

13:45da OKMK 51-sonli Kasbiy yong‘in qutqaruv qismi, Fuqaro muhofazasi otryadi va kon boshqarmasi tez tibbiy yordam xizmati favqulodda vaziyat joyiga yetib keladi va BelAZ avtosomasvalidagi yong‘in to‘liq o‘chiriladi.

Mashg‘ulot yakunida esa yo‘l quyilgan kamchiliklar yuzasidan fikr-mulohazalar bildirildi va shu kun o‘tkazilgan o‘quv-mashg‘ulot yakunida qoniqarli deb baholandi.

Albatta, bu kabi tadbirlar favqulodda holatlar yuz berganda fuqaro muhofazasi tuzilmalarining avariya-qutqaruv va boshqa shoshilinch yordam koʻrsatish ishlarida to‘g‘ri harakatlanishlari uchun xizmat qiladi.

Axborot xizmati