Olmaliq kon-metallurgiya kombinati tomonidan joriy yilning yanvar oyida barcha ishlab chiqarish vazifalari bajarildi.

Jumladan, tovar mahsulotlari ishlab chiqarish rejasi 107,5%ga ado etildi.

Qalmoqqir kon boshqarmasi tomonidan ma'dan qazib olish vazifasi 100%ga bajarilib, o‘sish sur'ati 100,7%ni tashkil etdi. Ustki qatlam rejasi esa 103,7%ga bajarildi.

Mis xom ashyosini qayta ishlash rejasi bo‘yicha 106,2%lik o‘sish sur'ati qayd etildi.

Ushbu yo‘nalishda 2-Mis boyitish fabrikasi mehnat jamoasi rejani 102,3%ga bajardi.

Konsentratda mis metalli bo‘yicha rejaviy vazifalar 109,6%ga bajarilgan holda o‘sish sur'ati 105,6%ga yetkazildi. Bu yo‘nalishda  Mis boyitish fabrikasi(109%) va 2-Mis boyitish fabrikasi(114%) mehnat jamoalari o‘zlariga yuklatilgan vazifani oshig‘i bilan bajarishdi.

Shuningdek, kombinatning asosiy mahsuloti bo‘lgan mis katodi ishlab chiqarish bo‘yicha vazifa 102,4%ga, o‘z xom ashyomizdan mis katodi ishlab chiqarish rejasi 122,2%ga ado etildi.

O‘z xom ashyomizdan rux ishlab chiqarish vazifasi esa 102,7%ga bajarilishi ta'minlandi.

Bundan tashqari, Surxon vohasida joylashgan Xondiza kon boshqarmasi mehnat jamoasi ham yilning birinchi oyida ko‘zlagan natijalarga erishdilar. Xususan, polimetall ma'danlarni qazib olish(100%), uni qayta ishlash(100,1%) rux konsentratida rux(100,2%) kabi vazifalarni yorug‘ yuz bilan ado etishdi.

Angren kon boshqarmasi, Chodak kon boshqarmasi hamda Kovuldi koni kabi mehnat jamoalari ham 2025-yilning 1-oyida barcha yuklatilgan vazifalarni bajarishdi. Ular tomonidan oltin tarkibli ma'danlarni qazib olish, qayta ishlash, metall konsentratida 1- va 2-metall kabi rejalarning bajarilishi ta'minlandi.

Shuningdek, mis kuporosi(100%), emallangan mis simlar(100%), texnik selen(100%), texnik tellur(100%), perrenat ammoniy(101,2%), palladiy kukuni(101,9%) kabi mahsulotlarni ishlab chiqarish bo‘yicha ham barcha progonozlar bajarilganini alohida ta'kidlash joiz.

Axborot xizmati