Olmaliq kon-metallurgiya kombinati o‘zining 75 yilligi bayrami arafasida ishchi-xodimlarning farzandlari uchun munosib sovg‘a hozirladi.

Bayram arafasida 12-sonli “Daryocha” nomidagi maktabgacha ta'lim tashkiloti to‘liq ta'mirlanib, foydalanishga topshirildi.

Mazkur bog‘chaning tantanali ochilish marosimida OKMK boshqaruv raisi Abdulla Xursanov, mehnat faxriylari va keng jamoatchilik vakillari ishtirok etishdi.

Tadbir avvalida so‘z olgan OKMK boshqaruv raisi Abdulla Xursanov Olmaliq kon-metallurgiya kombinati bugun nafaqat investitsiya loyihalarining faol ijrochisi balki ijtimoiy sohani ham doim qo‘llab-quvvatlab kelayotganini ta'kidlab, ushbu bog‘chaning bayram arafasida topshirilishi hurmatli Prezidentimiz tomonidan olib borilayotgan islohotlarning amaldagi ifodasi ekanligini aytib o‘tdi.

Shuningdek, tadbirda mehnat faxriylari ham so‘z olib, mana shunday zamonaviy bog‘chani ta'mirlab, foydalanishga topshirayotgan kombinat rahbariyatiga minnatdorchiliklarini bildirishdi.

Tadbir davomida bir guruh quruvchilar va bog‘cha xodimalari qimmatbaho sovg‘alar bilan taqdirlanishdi.

Mehnat faxriylari ishtirokida ramziy lenta qirqilib, maktabgacha ta'lim tashkiloti rasman foydalanishga topshirildi.

Ushbu obyektni ta'mirlash ishlari 2024-yil iyun oyida Olmaliq kon-metallurgiya kombinati homiyligida boshlangan. Bog‘cha 1964-yilda ishga tushirilgan bo‘lib, 96 o‘ringa mo‘ljallangan. Shu kunga qadar tashkilot joriy ta'mirlardan chiqarib kelingan, lekin kapital ta'mirlanmagan edi. Ta'mir ishlari pudrat tashkiloti “Olmaliqmetallurgqurilish“ tresti tomonidan bajarilib, binoning barcha bo‘limlarida pardozlash ishlari amalga oshirildi.

Kapital ta'mir jarayonida oshxona, kir yuvish xonasi, oziq-ovqat omborxonalari, qorovulxona, guruhlar xonalari, xodimlarga mo‘ljallangan xonalar zamonaviy qiyofaga keltirildi.

Bolalar yozgi ayvonchalari, yozgi basseyn va amfiteatr to‘liq ta'mirlandi.

Binoning issiqlik, sovuq va issiq suv tizimi hamda kanalizatsiya quvurlari ham butkul yangilandi. Xonalarda santexnik jihozlari, yoritish chiroqlari almashtirilib, yong‘inga qarshi signalizatsiyalar, videokuzatuv va aloqa tizimlari o‘rnatildi.

Bundan tashqari, bog‘chaning o‘yin maydonchalariga yangi arg‘imchoqlar, sirpanchiqlar, ertaksimon uychalar, qumdonlar o‘rnatildi.

“Daryocha” bog‘chasi bayram oldidan kombinat ishchi-xodimlarining farzandlariga o‘ziga xos tuhfa bo‘ldi.

Axborot xizmati