Joriy yilning 11-oktyabr kuni "Metallurg" madaniyat saroyida OKMK xodimlari o‘rtasida o‘tkazilgan "Energiya samaradorligini oshirish, mahsulot tannarxini pasaytirish va xarajatlarni kamaytirish bo‘yicha eng yaxshi ratsionalizatorlik takliflari" tanlovi g‘oliblarini taqdirlash marosimi bo‘lib o‘tdi.

Tadbirda so‘z olgan "Olmaliq KMK" AJ boshqaruvi raisi Abdulla Xursanov tanlovning barcha ishtirokchilariga ularning faol ishtiroki, ijodiy yondashuvi va ishlab chiqarish jarayonlarini yaxshilashga intilishi uchun minnatdorchilik bildirdi. Abdulla Xolmuradovich, shuningdek, korxonani rivojlantirish uchun bunday tashabbuslarning muhimligini ta'kidlab, ratsionalizatorlik takliflari nafaqat energiya samaradorligini oshirish va xarajatlarni kamaytirishga yordam berishini, balki OKMKning kelajakdagi taraqqiyotida asosiy rol o‘ynashini aytib oʻtdi.

Shundan so‘ng tanlov g‘oliblarini taqdirlash marosimi bo‘lib o‘tdi.

Jumladan, Markaziy ta'mirlash-mexanika zavodi(MTMZ) ishlab chiqarish-texnik bo‘limi boshlig‘i vazifasini bajaruvchi Rustam Parpiyev, MTMZ dizayn byurosi boshlig‘i Andrey Yefremov, MTMZ bosh energetigi Aleksandr Nikitin, MTMZ yetakchi muhandis-texnologi Mixail Prokudin, OKMK Mehnatni muhofaza qilish va sanoat xavfsizligi bo‘limi birinchi toifali muhandisi Jasur Absalomov, OKMK texnik bo‘limi muhandis-texnologi Xayrulla Abdusattorov, avtomobil transporti boshqarmasi transport monitoringi dispetcherlik xizmati operatori Vadim Buzovlar pul mukofotlari bilan rag‘batlantirildi.

G‘oliblarning har biri o‘z ishlanmalarining qisqacha sharhini taqdim etib, ularning g‘oyalari ishlab chiqarish jarayonlarini optimallashtirishga va OKMKning umumiy ish ko‘rsatkichlarini yaxshilashga qanday yordam berishini aytib berishdi.

Tadbirning rasmiy qismidan so‘ng "Metallurg" madaniyat saroyi badiiy havaskorlik jamoalarining chiqishlari namoyish etildi.

Ta'kidlash joizki, ushbu tanlov xodimlar o‘rtasida innovatsion g‘oyalarni rivojlantirish imkoniyatini yaratdi va korxonada ishlab chiqarish samaradorligini oshirishda xodimlarning yuqori darajadagi ishtirokini namoyish etdi.

Axborot xizmati