Mamlakatimiz sanoat salohiyatini, ayniqsa, tog‘-kon va metallurgiya tarmog‘ini mustahkamlashda infratuzilma va texnologik jarayonlarni modernizatsiya qilish eng muhim omil hisoblanadi. Shu munosabat bilan O‘zbekiston hukumati Olmaliq kon-metallurgiya kombinati kabi muhim korxonalarni rivojlantirishga qaratilgan loyihalarni faol qo‘llab-quvvatlamoqda

Davlatning e’tibori va ko‘magi tufayli OKMK ishlab chiqarish quvvatlari, samaradorligi va xavfsizligini oshirish, shuningdek, logistikani yaxshilashni ta’minlaydigan keng ko‘lamli loyihalarni amalga oshirish imkoniyatiga ega bo‘lmoqda.

Xususan, Prezidentimizning 2020-yil 26-maydagi PQ-4731-son qarori hamda "Yoshlik I konini o‘zlashtirish" investitsiya loyihasi doirasida temir yo‘l infratuzilmasi sohasida yirik loyihalar amalga oshirilmoqda. Jumladan, kombinatning sanoat temir yo‘l transportini boshqarishda mikroprotsessorli markazlashtirish va o‘qlarni hisoblash tizimini joriy etish belgilangan. Bu innovatsiyalar nafaqat ishlab chiqarish jarayonlarini takomillashtiradi, balki temir yo‘l infratuzilmasi faoliyatidagi xavfsizlik va aniqlik darajasini ham sezilarli darajada oshiradi. Bu esa, ayniqsa, yuk tashish barqarorligini ta’minlash uchun nihoyatda muhimdir.

Hozirgi kunda OKMK va temir yo‘l transporti hamda sanoat uchun muhandislik yechimlarini loyihalash va amalga oshirishga ixtisoslashgan "TRANS ENGINEERING GROUP" kompaniyasi o‘rtasida mazkur tizimni joriy etish bo‘yicha hamkorlik o‘rnatilgan. Ushbu hamkorlik har ikki tomonning tajribasi va resurslarini birlashtirish orqali yangi texnologiyalarni tezkor va samarali tatbiq etishga yordam beradi. Bunday yondashuv yirik korxonalar uchun murakkab muhandislik yechimlarini muvaffaqiyatli amalga oshirish uchun ishonchli hamkorlarni jalb qilish qanchalik muhimligini ko‘rsatadi.

Joriy yilning 29-oktyabr kuni Sanoat temir yoʻl transport boshqarmasi mutaxassislari "Otvalnaya" stansiyasi uchun MPS va SSO tizimining dasturiy ta’minotini sinovdan o‘tkazishda ishtirok etdilar. Sinovning asosiy maqsadi ushbu tizimni o‘rganish hamda stansiyani yo‘naltirish dasturini o‘rnatishdan oldin ishga tushirishdan iborat edi.

Tizim jahon standartlariga javob beradi va temir yo‘l stansiyasini to‘liq raqamlashtirish, yuklarni o‘z vaqtida yetkazib berish, shuningdek, tarkiblar harakati xavfsizligini ta’minlaydi. Bunday tizimlarning joriy etilishi jarayonlarni avtomatlashtirish va raqamlashtirish uchun yangi imkoniyatlarni ochadi. Inson omilini minimallashtiradi va keng ko‘lamli logistika operatsiyalari uchun yanada moslashuvchan va barqaror sharoitlarni yaratadi.

Ushbu sinov tizimning yuqori ishonchliligi va samaradorligini ko‘rsatdi.

Axborot xizmati