Olmaliq kon-metallurgiya kombinati tomonidan 2025-yilning ilk oyida mahsulotlar eksporti bo‘yicha belgilangan vazifalar bajarilishiga erishildi.

Jumladan, xorijga 2,7 ming tonna mis mahsulotlari yuborilib, prognoz 108,4% ga bajarildi.

Shuningdek, 1,5 ming tonna rux mahsulotlari eksporti amalga oshirilib, reja 119,3% ga ado etildi. O‘tgan yilning shu davriga nisbatan o‘sish sur'ati esa 153,5% ga yetkazilganini alohida ta'kidlash joiz.

Bundan tashqari, mis kuporosi eksportida ham yuqori o‘sish sur'ati kuzatildi. Reja 101,7% ga bajarilib, o‘sish sur'ati 138,8% ni tashkil etdi.

OKMK tomonidan 2025-yilning yanvar oyida jami bo‘lib 28,8 mln dollarlik mahsulotlar eksport qilinib, reja 103,8%ga bajarildi.

Ma'lumot uchun: Yildan yilga OKMK eksport geografiyasi kengayib bormoqda. Hozirda kombinat mahsulotlari 19 ta davlatga eksport qilinmoqda. 2024-yilda bir qator yangi bozorlar o‘zlashtirildi. Jumladan, Gvineya, Senegal, Serbiya, Janubiy Afrika Respublikasi, Portugaliya kabi davlatlarga mis katankasi va mis kuporosi eksporti amalga oshirildi.

2025-yilda ham yangi bozorlar o‘zlashtirilishi ko‘zda tutilgan. Xususan, Isroil va Marokash kabi davlatlarga mahsulotlar eksport qilinishi rejalashtirilgan.

Axborot xizmati