Joriy yilning 11-fevral kuni Mis boyitish fabrikasida Kasaba uyushmasi qo‘mitasining Mehnat muhofazasi bo‘yicha komissiyasi a’zolari hamda fabrikaning barcha uchastkalaridan yangi saylangan mehnat muhofazasi bo‘yicha vakillari uchun seminar tashkil etildi.

Seminarda ishtirokchilarga Vazirlar Mahkamasining 2025-yil 24-dekabrdagi “Mehnatni muhofaza qilish sohasiga oid ayrim nizomlarni tasdiqlash to‘g‘risida”gi 819-sonli qarori mazmun-mohiyati batafsil tushuntirib o‘tildi.

Mazkur qaror bilan tasdiqlangan yangi tahrirdagi nizomga ko‘ra, endilikda mehnat muhofazasi bo‘yicha vakillarning faoliyati tubdan takomillashtirilgan. Qarorda asosiy e’tibor quyidagilarga qaratilgan:

• Nazorat va tekshiruv: Vakillar ish joylarida mehnatni muhofaza qilish qoidalariga rioya etilishini va xodimlarning xavfsizligini ta’minlash ustidan jamoatchilik nazoratini amalga oshirish bo‘yicha keng vakolatlarga ega bo‘ldilar.
• Ish beruvchining majburiyati: Korxona ma’muriyati mehnat muhofazasi bo‘yicha vakillar o‘z vazifalarini bajarishi uchun zarur sharoitlar yaratib berishi, jumladan, ularni maxsus o‘quv kurslarida o‘qitishi shartligi belgilab qo‘yilgan.
• Ijtimoiy himoya: Vakillar o‘z zimmasiga yuklatilgan vazifalarni ishlab chiqarishdan ajralmagan holda bajarishi uchun haftasiga kamida ikki soat ish vaqti ajratilishi va bu vaqt uchun o‘rtacha ish haqi saqlanishi kafolatlandi.

Shuningdek, qaror talablariga muvofiq, korxonada mehnat xavfsizligini ta’minlashda nafaqat ma’muriyat, balki kasaba uyushmasi va saylangan vakillarning mas’uliyati yana-da oshirilganligi ta’kidlandi”.

Vakillarning ish faoliyatini to‘g‘ri va samarali tashkil etish, ularning vazifalari, bugungi kunda ularga qaratilgan e’tibor muhokama qilindi.

Mehnat muhofazasi va havfsiz mehnat sharoitlarini ta’minlash masalasi korxonadagi eng birinchi o‘rinda ekanligi, sexlarda xodimlarning mehnat sharoitlari doimiy nazoratda bo‘lishi darkorligi tushuntirildi.

Tadbirda kelgusi ish faoliyati bo‘yicha vazifalar belgilab olindi.

Nuriddin Egamberdiyev,

MBF kasaba uyushmasining mehnat muhofazasi bo‘yicha komissiyasi raisi