AOKAda "Olmaliq KMK" AJ axborot xizmati rahbari Umida Qarshiboyeva ishtirokidagi brifingda ijtimoiy sohani qo‘llab quvvatlash borasida 2024-yilda amalga oshirilgan ishlar haqida ma'lumot berildi.

Olmaliq kon-metallurgiya kombinati ijtimoyi sohani qo‘llab quvvatlash borasida 2024-yilda amalga oshirgan ishlari bilan tanishtirib o‘tamiz. Aytish joizki, OKMK ishlab chiqarish ko‘rsatkichlarini bajarish barobarida respublikamizni ijtimoiy sohasini qo‘llab quvvatlash va rivojlantirish maqsadida salmoqli hissa qo‘shib keladi.

Xususan, joriy yilda kombinat homiyligida Namangan viloyati Pop tumanidagi Chodak qishlog‘ida yangi tikuvchilik fabrikasi ishga tushirildi. Kombinat tomonidan tikuv fabrikasi uchun Yaponiya va Xitoyda ishlab chiqarilgan tikuv mashinalari xarid qilindi va 520 nafar ayol ish bilan ta'minlandi.

Toshkent viloyati Oqqo‘rg‘on tumani “Eltamg‘ali” Mahallasida bolalar bog‘chasi va turar joy binosi foydalanishga topshirildi. 2 qavatli binoda joylashgan bolalar bog‘chasi 80 o‘ringa mo‘ljallangan bo‘lib, bino to‘liq barcha jihozlar bilan ta'minlandi. Shuningdek, 2 qavatli binoda 14 ta 2 xonali xonadonlar boquvchisini yo‘qotgan, ijtimoiy himoyaga muhtoj  oilalarga berildi. Ushbu ta'mirlash ishlariga 7,33 mlrd so‘m sarflandi.

Toshkent viloyati Angren shahrida joylashgan 34-sonli ixtisoslashtirilgan maktab-internatga turar-joy binolarini ta'mirlash uchun qurilish materiallari ajratildi. Shuningdek, Angren shahrini ijtimoiy qo‘llab quvvatlash maqsadida 2 842 p/m issiqlik magistral quvurlari almashtirildi. Bugungi kunda qo‘shimcha 2 987 p/m issiqlik magistral quvurlarini almashtirish ishlari olib borilmoqda.

Toshkent viloyatining ijtimoiy soha obyektlarini (maktabgacha ta'lim tashkilotlari, maktablar, shifoxonalar, oilaviy poliklinikalar) isitish qozonlari va issiqlik tizimini ta'mirlash maqsadida 22,2 mlrd so‘m homiylik mablag‘i ajratildi.

Toshkentning Shayxontohur tumani mahallalaridagi ijtimoiy himoyaga muhtoj aholi qatlamlarini moddiy qo‘llab quvvatlash va hududlarini obodonlashtirish ishlariga 1 mlrd so‘m homiylik mablag‘i o‘tkazib berildi.

“Yunusobod siti” hududida podstansiya va 110 kV kabel tarmog‘ini qurish ishlariga amaliy yordam ko‘rsatildi. Ushbu ishlarga 210 mlrd so‘m mablag‘ sarflandi.

 O‘zbekiston ko‘zi ojizlar jamiyati yurak-asab kasalliklari sihatgohi” binosidagi mavjud 2 ta liftlari xayriya mablag‘lari hisobidan yangisiga almashtirildi.

Shuningdek, 2024-yil fevral oyida elektr tarmog‘ida ko‘p uzilishlar bo‘layotgan mahallalar 1 ta 1000 kV kuchlanishli transformator bilan ta'minlandi.

Sirdaryo viloyati Sirdaryo tumanidagi 71-son maxsus maktab-internati qurilishiga 22,5 mlrd so‘mlik homiylik yordami ko‘rsatildi.

Bekobod shahridagi mahallalarni obodonlashtirish ishlariga 2 mlrd so‘m mablag‘ berildi.

Yangi yo‘l tumanidagi mahallalarni obodonlashtirish uchun 657 mln mablag‘ berildi.

Ayni kunlarda kombinat homiyligida Bekobod shahridagi ko‘p tarmoqli markaziy shahar poliklinikasida kapital ta'mirlash ishlari olib borilayapti. Ta'mir ishlari 2024-yilning oxiriga qadar tugallanishini belgilangan bo‘lib, kapital ta'mir ishlariga 2 mlrd so‘mdan oshiq mablag‘ yo‘naltirilishi ko‘zda tutilgan.

 Olmaliq shahridagi “Hilol” jome masjidi hududini asfalt bilan qoplash uchun 820 mln so‘mlik homiylik ko‘rsatildi.

Ijtimoiy soha obyektlariga jami bo‘lib 652 kVtlik quyosh fotoelektr stansiyalari o‘rnatib berilgan.

Aprel oyida OKMKda Muhandislik maktabi o‘z faoliyatini boshladi. Kombinat ehtiyojlari uchun professional muhandis-texnik xodimlarni qayta tayyorlash maqsadida Muhandislik maktabi barpo etildi. Maktabni loyihalash Germaniyaning “Aurubis” kompaniyasining o‘quv markazi namunasida amalga oshirildi. Muhandislik maktabida geologiya, konchilik ishi, kon sanoati transportlari, marksheyderlik ishi, foydali qazilmalarni boyitish, metallurgiya, mexanika, energetika, ishlab chiqarishni avtomatlashtirish yo‘nalishlarida faoliyat olib borayotgan mutaxassislar o‘qitiladi.

2024-yil may oyida Olmaliq shahrida joylashgan “Quruvchilar” bog‘i foydalanishga topshirildi. Kombinat ishchi-xodimlari tomonidan Obodonlashtirish va qurilish ishlari natijasida 3 150 daraxt ko‘chati va 25 000 tup gul ko‘chati ekildi. Yashil maydonlarni sug‘orish tizimi yangilandi. Yoritish tizimi ham yangilandi

2024-yil avgust oyida kombinat mehnat faxriylari uchun “Nuroniylar maskani” foydalanishga topshirildi. Maskanda faxriylar uchun turli xil adabiyotlarni mutolaa qilishlari, shaxmat, shashka kabi sport o‘yinlarini o‘ynashlariga hamda ovqatlanishlari uchun sharoitlar yaratilgan.

2024-yil oktyabr oyida Ijtimoiy obyektlar boshqarmasi tasarrufidagi 12-sonli “Daryocha” maktabgacha ta'lim tashkiloti to‘liq ta'mirlanib, foydalanishga topshirildi. Bog‘chaning ta'mir ishlariga 3,75 mlrd so‘m mablag‘ sarflandi.

Bundan tashqari, kombinat ishchi xodimlarning sharoitlarini yaxshilash borasida ham bir qator xayrli ishlarni bajarib kelmoqda. Xondiza kon boshqarmasida 200 o‘rinli yotoqxona foydalanishga topshirildi. Mazkur yotoqxona uzoq masofadan kelib konda ishlaydigan ishchi-xodimlar uchun mo‘ljallangan bo‘lib, qurilish ishlariga 5,1 mlrd so‘mdan oshiq mablag‘ sarflandi.

Joriy yilda shuningdek, OKMK futbol jamoasining akademiyasi tarbiyalanuvchilari uchun 2 ta futbol maydonlari foydalanishga topshirildi. 

Shuningdek, kombinat tomonidan ishchi-xodimlarning salomatligini muhofaza etish maqsadida bepul tibbiy ko‘riklar tashkil etildi. O‘zbekiston Respublikasi Sog‘liqni saqlash vazirligi Milliy tibbiyot markazi tomonidan mobil angiograf tibbiy qurilmasi yordamida kombinatda mehnat qilayotgan 100 ga yaqin ayollar malakali shifokorlar tomonidan yurak qon tomir kasalliklari bo‘yicha tezkor tibbiy tekshiruvdan o‘tkazildi.

“100 matonatli ayol”, “Birgalikda bayram qilamiz”, “Biz birgamiz!”, “Matonatingiz oldida bosh egamiz!” “Yurakdan yurakka”aksiyasi shiorlari ostida ehtiyojmand va nogironligi bo‘lgan 1800 nafar kishi ijtimoiy va moddiy qo‘llab-quvvatlandi.

“O‘zbekiston bo‘ylab sayohat qil” shiori ostida turistik sayohatlar tashkil etilib, 1134 nafar ishchi-xodimga imtiyozli narxlarda yo‘llanmalar ajratildi. Shuningdek, ularning 532 nafariga bepul yo‘llanmalar berildi.

5451 nafar xodimlar va ularning oila a'zolari kombinat sanatoriy-profilaktoriysida hamda Respublika sanatoriyalarida sog‘lomlashtirildi.

Yozgi ta'til davrida kombinat ishchi-xodimlarining 4357 nafar farzandlari OKMK bolalar dam olish oromgohlarida dam olishdi. Shundan 342nafariga bepul yo‘llanmalar ajratildi.

Har oyda 1151 nafar kombinat nafaqaxo‘rlari, II jahon urushi mehnat fronti qatnashchilari, Baynalminal jangchilar hamda Chernobil AES avariyasini bartaraf etishda ishtirok etganlarga  oziq-ovqat jamlanmalari berildi.

2024-yilda 278 nafar ayollar, 35 nafar nogironligi bo‘lgan shaxslar, 14 nafar chin yetim va vasiylikka olinganlar kombinatga ishga qabul qilingan.

Olmaliq shahridagi ko‘p qavatli uylarni, mahallalarni va ijtimoiy obyektlarni ta'mirlash ishlariga 7,5 mlrd so‘m mablag‘ sarflandi.

Yashil makon loyiha doirasida jami 243 gektar yer maydoniga 1,5mln daraxt ko‘chatlari ekildi.

Sport sohasida OKMK faol. Xususan, 2024-yilning may va avgust oylarida gandbol bo‘yicha Toshkentda bo‘lib o‘tgan Markaziy Osiyo ochiq chempionatida Oliy liga OKMK erkaklar jamoasi 1-o‘rinni, ayollar jamoasi 2-o‘rinni egalladi. O‘zbekiston Respublikasi Mustaqilligi kubogi bahslarida gandbolchi erkaklar 1-o‘rin, ayollar jamoasi 3-o‘rinni qo‘lga kiritishdi. Gandbol bo‘yicha OKMK erkaklar va ayollar jamoasi mamlakat chempioni bo‘lishdi. “OKMK-W” ayollar futbol jamoasi mamlakat chempionatida ikkinchi o‘rin sohibi bo‘lishdi. Futbol bo‘yicha OKMK PFK jamoasi superligada mavsumni 47 ochko to‘plagan holda kumush medal bilan yakunladi. 11-dekabr kuni OKMK jamoasiga Feyr-pley sovrini tantanali ravishda topshirildi.

Olmaliq kon-metallurgiya kombinati ijtimoiy sohani qo‘llab quvvatlash borasidagi ishlari davom ettiradi. Zero, oldimizga qo‘yilgan ustuvor yo‘nalishlardan biri bu xalq farovonligini oshirishga xizmat qilishdir.