Operatsion samaradorlikni oshirish “Olmaliq kon-metallurgiya kombinati” AJ faoliyatining asosiy ustuvor yoʻnalishlaridan biri boʻlib, korxonaning iqtisodiy barqarorligini taʻminlash, resurslardan samarali foydalanish va ishlab chiqarish jarayonlarini takomillashtirish orqali barqaror rivojlanishni kafolatlaydi. Bu jarayon mahsulot tannarxini pasaytirish, energiya va xomashyo tejamkorligini oshirish, shuningdek, texnologik va tashkiliy samaradorlikni yaxshilash orqali kombinatning dunyo bozoridagi pozitsiyasini mustahkamlashga xizmat qiladi. Ushbu muhim yoʻnalishda kombinatda yangi mexanizm joriy etildi. Endilikda mazkur mexanizm yordamida xodimlar takliflarini taqdim etib, kombinatning operatsion samaradorligini oshirishga hissa qoʻshish orqali moddiy ragʻbatlantiriladilar.

Xodimlar, kon ishlari, boyitish, metallurgiya, energetika, mexanika, transport, qurilish, raqamlashtirish, yoqilgʻi-energiya va xomashyo sarfini kamaytirish, mehnat unumdorligini oshirish, mehnat sharoitlarini yaxshilash, chiqindilarni qayta ishlash kabi asosiy yo‘nalishlar bo‘yicha takliflarini taqdim etishlari mumkin boʻladi.

Yangi mexanizmning boshqa oʻxshash mexanizmlardan afzalligi, muallif uchun taklifni ishlab chiqishda maksimal yengilliklar yaratish hamda taklifni tatbiq etishda ishtirok etgan barcha xodimlarni rag‘batlantirishdan iborat.

Jarayon qanday ishlaydi?

Operatsion samaradorlikni oshirish takliflarini taqdim etish, koʻrib chiqish va amalga oshirish toʻrt bosqichdan iborat:

1. Takliflarni ishlab chiqish (1-bosqich): kombinat xodimlari oʻz takliflarini Telegram ilovasida @agmk_bot orqali rasmiylashtiradi. Tarkibiy boʻlinmada tuzilgan ishchi guruh takliflarni koʻrib chiqadi, saralab, loyiha hujjatlarini tayyorlash guruhini tayinlaydi.
2. Loyiha hujjatlarini ishlab chiqish (2-bosqich): loyiha hujjatlarini tayyorlash guruhi texnik-iqtisodiy hisob-kitoblar, reja, muddatlar, xavflar tahlili va pilot loyiha rejasini tayyorlaydi. Operatsion samaradorlikni boshqarish va muvofiqlashtirish qoʻmitasi hujjatlarni koʻrib chiqadi va keyingi bosqichga oʻtkazish toʻgʻrisida qaror qabul qiladi. Tasdiqlangan loyiha boʻyicha taklif muallifi 1 BHM miqdorida mukofotlanadi.
3. Pilot loyihalarni amalga oshirish (3-bosqich): Zarur hollarda, pilot (tajriba-sinov) loyihasi reja boʻyicha amalga oshiriladi, hisobot tayyorlanadi va Qoʻmita keyingi bosqichga oʻtkazish toʻgʻrisida qaror qabul qiladi.
4. Loyihalarni amalga oshirish (4-bosqich): Asosiy loyiha reja boʻyicha amalga oshiriladi, monitoring qilinadi va mukofotlar taqsimlanadi.

Ragʻbatlantirish

Taklif amalga oshirilgandan soʻng yillik keltirgan foydadan 10 foizgacha umumiy ragʻbatlantirish miqdori aniqlanadi. Umumiy rag‘batlantirish mablagʻlarining 60 foizi loyiha boʻyicha taklif muallifiga, 40 foizi qolgan ishtirokchilarga taqsimlanadi.

Kombinatning barcha xodimlarini operatsion samaradorlikni oshirishda o’z hissasini qo’shishga chaqiramiz!

Qo‘shimcha ma’lumotlarni tarkibiy bo‘linmada tashkil etilgan Ishchi guruhdan olishingiz mumkin.

Bobur Siddikjonov,

Transformatsiya, ESG va xalqaro reytinglar loyiha ofisining strategiya

va operatsion samaradorlikni oshirish boʻlimi boshligʻi